मिलन र बिछोडका सुस्केरा l

1

साइँली,

नौ डाँडा पारी सपनै सपना छ रे 

इन्द्रेणी रंग भर्न पाइन्छ रे
आकाशको तारा झैं झिलिमिली
खुशी नै खुशी छ रे
जाम न साइँली हामी पनि बसम 
तेही डाँडा पारीको चौतारीमा
अनि संगै नाचम्ला सारंगीको भाकामा
तिमी थाके म काँध दिम्ला
म थाके तिमी साथ
जाम है ?

2

अलिकति शब्द म भर्छु

अलिकति आवाज तिमि भर 

अलिकति जीवन संगै जिउँला

अलिकतिको यो जीवनमा l

उड्दै भेट्दै फेरि उड्दै छुट्टिने

यो अचम्मको जीवन न हो

अलिकति मुस्कान म हाँस्छु 

अलिकति खित्का तिमी हाँस

अलिकति आँसु संगै झारौंला

अलिकतिको जीवनमा l

हिमाल पारी तिम्रो गाउँ होला

यो नदि वारीको केहि क्ष्रणको राउटे म बनम्ला

अलिकति साथ म दिन्छु

अलिकति हात तिमी थाम

अलिकति आकाश एउटै हेरौंला

अलिकतिको यो जीवनमा l

आज छुट्टिए के भयो र 

भोलि फेरि संगै बाँचौन्ला नी 

अलिकति आशा तिमि बुन 

अलिकति सपना म बुनम्ला

अलिकति बिछोड तिमि हाँस

अलिकति मिलन म कोरम्ला 

अलिकतिको यो जीवनमा l

अलिकति जीवन संगै बिताम्ला l

3

आज निन्द्रा पर्या छैन l 

शब्द नि फुर्या छैन l
केहि सोच्या नि छैन l
सोच्न सक्या नि छैन l

लाग्छ ठुलो संसारको एउटा सानो कुनामा
म आफुले आफ़ुलाईनै हेरिराछु
छक्क परेर l

न त दिमागमा केहि छ
न नै त मनमा
मात्र पल्लो त्यो घरमा
कुक्कुर भुक्या भुकेइ छ एक्कोहोरो
झ्याल नेरी जुनकिरी किरमिर किरमिर गरेजस्तै 

एउटा स्वाश भित्र तान्यो
अर्को फेर बाहिर
अन्धकार सहरलाई एकटक नियाल्नु परेको शालिक झैं
म अकस्मात लाटो बन्या छु
बोलौं त के बोलौं,
को संग l

अझै निन्द्रा पर्या छैन आज l

4

प्राय जसो म एकटक कम्पुटर इस्क्रिन मैं टोलाऊँछु 

केहि नसोची एकटक 

एउटा तस्बिर 

अनि अर्को हाँसो 

केहि पर्खाई

अनि केहि चोट 

अहिलेको लागि एति नै हो मेरो जिन्दगीको मधुर रोमान्स 

मन भुल्याउने बाटो l

5

म ब्युझनु भन्दा ठिक अघि 
उनले मलाई सोधिन 
"सपना पारीको को यो अर्ध-सत्य राम्रो 
कि सपना वारी को त्यो पूर्ण बास्तविकता ? "

जवाफ दिनै नपाई म ब्युझेछु,
अब खै कुन चैं लाई सपनामा भनुँ
र कुन चैं लाई विपना
दुवै संसार जिउञ्जेल उति नै वास्तविक छन्
मात्र यति हो,
 संसारका धेरै नियमहरु छन्,
र संसारमा सायद भौतिकताको मात्र जित हुन्छ,
सायद हामीलाई यो असत्य सत्य लाग्छ
तर आखिर, के नै फरक पर्छ र,
चेतनशील मनका यी प्रतिबिम्बहरु पनि
कति सत्य छन्, कसलाई नै थाहा छ र !
र खै कुन चैं लाई सपना भन्ने
र कुन चैं लाई बिपना

यति मात्र बुझ
खोलाको बिचमा, किनारमा हैन, मात्र हामी छौँ
मात्र "हामी"
र किनारा-बिहिन यो खोला सत्य-असत्य जे भएनी
मात्र तिमी-र-म को यो समागम सत्य छ
हो मात्र "हामी" सत्य छौँ
र मात्र त्यहि सत्य राम्रो छ

6

निलो आकाश, इन्द्रेणी, अग्ला हिमाल, जंगल, उडिरहेका चरा-चुरुंगी, 

रंगी-विरंगी फुल, अनि सिमसिमे पानि मा भिज्दै हिंडेका बटुवाका अन्जान मुस्कान
अनि अरु धेरै कुरा हरु,
राम्रा देखिन्छन, धेरै नै राम्रा l
मात्र जब तिम्रो ओठमा मुस्कान रसाउँछ l

तिमी हाँसे संसारै राम्रो
रिसाए संसारै उदासिन l